qosıq
Ellerim bardı
Ájiniyaz Qosıbay ulıSorasań elimdi Qojban bizlerden,
Qalpaǵı qazanday ellerim bardı,
Qate shıqsa, keshirińler sózlerden,
Qıtay, Qońırat atlı ellerim bardı,
Jaylawım Urgenish, arqası — teńiz,
Jawırını qaqpaqtay malları semiz,
Ruxsatsız bir-birine salmas iz,
Birlikli Qońırat ellerim bardı.
Tabıladı izlegenniń keregi,
Kólinde bar qasqaldaǵı, uyregi,
Kuwları, gazınıń, pútin búyregi,
Dúnyanın ańları kólimde bardı.
Ótirikti ıras etip aytpaǵan,
Tuwrı joldan bas ketse de qaytpaǵan,
Nemexremdi xasla joldas tutpaǵan,
Atı qaraqalpaq ellerim bardı,
Sóylegende sheker eter sózińdi,
Kórgende biymaǵrur eter ózińdi,
Baharı toydırar eki kózińdi,
Leyli, Zuleyxaday qızları bardı.
Suyrik sawsaǵanda periwza uzik,
Belleri qınalgan bir qısım názik,
Xár qolında altın-gúmis bilezik,
Sallanıp mes gezen qızları bardı.
Atqa shıqqan ashamaylı-qıyatta,
Qoldawlı-muyteniw — barlıq Qońıratta,
Qıtay-qıpshak, keńegesiuw manǵıtta,
At kótermes belli begleri bardı.
Gudarı belbewi dizege túsken,
Boyı aq. terekti aralap ósken,
Ǵanım kórse qaynap dáriyaday yoshqan,
Qalpaqtıń qalqanlı jigiti bardı.
Belleskende xan palwanın qoymaǵan,
Kúsh-qarıwı bir boyına sıymagan,
Shaqırmasa merekege barmaǵan,
Qońırattıń gúrjektey palwanı bardı.
Yadıma túskende kewlim ósken,
Kózim kórmegenshe kókeyim kesken,
Jılında miyewlep ush iret pisken,
Atı sutilmektey jemisim bardı.
Sárxawız boyında sayalı terek,
Jeseń til úyirgen áseliw pálek,
Qırında qızarıp pisken gewirek,
Qawınday mazalı jemisim bardı.
Mal iyesin tabar, sóz tapsa júye,
Shóbinde sháfáát, qusında kiye,
Teńiz eteginde bolar qanshiye,
Bulardıń bershesi elimde bardı.
Kórmegen xayranda esleri tanar,
Urgenish naqqashı maqbari minar,
Baǵlarımda bisyar almayıw-anar,
Xesapsız mazalı miywesi bardı.
Jilwa taslap xárne barıp saz etken,
Jigitlerdiń kewlin báhár, jaz etken,
Qasın qaǵıp jilwá bilán naz etken,
Baǵlardıń ishinde qızları bardı.
Men buyerde júrgen ishi zerdeli,
El jurttı kórmegen aǵır dárdeli,
Kewlimniń xoshı joq, men hám bir dertli,
Aytsam ishte tolǵan hadiysim bardı.
Nesip aydap siziń ellerge kelgen,
Kim jaqsı, kim jaman parqını bilgen,
Hár ne barın sizge bayan áylegen,
Qalpaqtıń Kámiyne Ziywarı bardı.