Ayralıq

Bawırımdı giryan etti, Zalım ayralıq-ayralıq. Kewlimdi wayran etti, Zalım ayralıq-ayralıq. Basıma túsip álamat, Qutıla almastay salamat, Kórsetti bizge káramat, Zalım ayralıq-ayralıq. Ayralıqtıń jábiri ótti, Jılay-jılay bári ketti, Azı-kem aytsaq ne etti, Zalım ayralıq-ayralıq. Kóllerim bar, kóllerim bar, Kóp wrıwlı ellerim bar, Ne bir jaman isleriń bar, Zalım ayralıq-ayralıq. Endi seni kórmek joqtı, Táriyp etsem ılayıqlı, Men aytaman xalayıqtı, Zalım ayralıq-ayralıq. Ayralıq degen úlken dárt, Sabır etpese oǵan márt, Kewline ólgenshe dárt, Zalım ayralıq-ayralıq. Doslar ırza bolǵan menen, Qawmı-qardash tuwǵan menen, Zárre wayım qılǵan menen, Ne payda jaman ayralıq. Ayralıqtıń jábiri jaman, Basta hár kún aqırzaman, Burında Bahram, Gúlandam, Bular ayralıq-ayralıq. Ayrılıp tánde kúshińnen, Hesh bir alalmay óshińnen, Janıp bárhama ishińnen, Júrgizer zalım ayralıq. Ayralıqtıń jábiri óter, Ólmese bir náwbet jeter, Aytqıl kewil parqın neter? Zalım ayralıq-ayralıq. Kewlińde tutsań nalıshtı, Bayan áylep jazı-qıstı, Birewdiń jansa sol pushtı, Zalım ayralıq-ayralıq.