Búlbil

Sheńgelge qonǵan búlbildiń, Shımshıq qurlım sáni bolmas. Ishqısında qızıl gúldiń, Sayrasa dármanı bolmas. Pári túsip qıyaǵınan, Sıyqı ketip sıyaǵınan, Tiken tırnap ayaǵınan, Qanatqanda qanı bolmas. Jılan ańlıp jılǵa saydan, Jıljıp kelse anadaydan, Shól búlbili bilsin qaydan? Shaqsa onıń emi bolmas. Nama tapsa, ırǵaq tappay, Shalqıp sayrar bir baǵ tappay, Tıńlawına qulaq tappay, Sayrawında máni bolmas. Ǵaqıldasıp qara qarǵa, Jemtik ańlıp qonar jarǵa, Bayıwlıday bayǵus bar ma? Jarǵanattıń pári bolmas. Bardıń isi párman menen, Joqtıń isi árman menen, Zarı-giriyan bolǵan menen, Kewlińniń qumarı bolmas. Tolqındı tayday tuwlatıp, Dawıl keler quyınlatıp, Putanı panalap jatıp, Shaqmaq shaqsa janı qalmas. Tárk áylep panıy dúnyanı, Jolǵa shıqsa dos yaranıń, Yıqılıp kóshki-áywanın, Pal shaynasań dámi bolmas. Jetim qalǵan bota bozlap, Árwana kóshegin izlep, Tawshan-kiyik tawın gózlep, Jáziyrasız jazı bolmas. Kúnler óter árman menen, Júgiń keter kárwan menen, Atı búlbil bolǵan menen, Torǵayday dáwranı bolmas. Sultan bolma ǵayrı elde, Shopan bol tuwǵan jerińde, Shaǵala qus óz kólinde Sharqıldamay sáni bolmas. Aqsham juldız aǵıp óter, Júrek-bawırım jaǵıp óter, Ǵamsız kúnim naǵıp óter, Dártimniń dármanı bolmas. Berdimurat haqtıń qulı, Sahranıń sarı búlbili, Besh kún miyman adam ulı, Ármansız bir kúni bolmas.