qosıq
Jubatıw
Ibrayim Yusupov(“Qulaǵım esitpeydi, kózim girew tarttı» dep nalıǵan
bir yashullıǵa)
«Esitpeydi» dep nalıma qulaqqa,
Onda turǵan hesh gáp joq arsınǵanday.
Bul kúnde sonday sózler aytılmaqta,
Esitkish qulaqlar da sarsılǵanday.
«Kózlerim girew tarttı» dep ókinbe,
Onda gáp joq, qısınıp, bekingendey,
Bul topalań dúnyada usı kúnde
Qızıq joq kórmedim dep ókingendey.