Shayır (M.Yu.Lermontovqa)

Xalıq óz júreginen tamshı qan alıp, Watan topıraǵına qarıp sap hújdan, Ólmes ruwhı menen úrlep dem salıp, Ullı niyet penen jan berer oǵan. Shiyrin ziban berip tuwǵan anası, Muhabbat besigin onıń terbeter, Asqar taw, aǵar suw, toǵay, dalası Bári onı tanıp tárbiyat eter. Ol sóytip dawıldan tınıshlıq izlep, Bir aqshamda jalǵız jolǵa túsedi. Kewlinde qarlı shıń aspandı gózlep, Juldız juldız benen sáwbetlesedi. Orfeydiń sıyqırlı sazın jańlatıp, Ol jaqsı sezimge intimaq eter. Dúnyanıń keń, gózzallıǵın ańlatıp, Tar peyilli insanlarǵa úyreter. Pálektiń gárdishi, zamannıń isi Júrek tarın shertip turadı birdey. Erkinlik, ómirge degen ıshqısı Tiygen jerin órter Demon lábindey. Qas kaqbas kim oǵan gózlep oq atsa, Máńgi kúler ózin atqan jawına. Insaniyattıń arına kim qol qatsa, Duelge shaqırar ol Mashuk tawına.