Shıntlap súygen kewil haslan aynımas

Shıntlap súygen kewil haslan aynımas, Sen ózińdi bostan-bosqa qıynadıń: Bizden kóre ajarlıraq hám de jas, Yar tapsam dep, jat pikirdi oyladıń. Satqın tiliń «súyemen» dep uyalmay, Sıbırladı, sóytip, bir jat qulaqqa. Sonda tuńǵısh muhabbatın qıyalmay, Hadal kewliń mensiredi biraqta. Maǵan sońǵı xattı jazıp, albırap, Qorqaq kolıń pochtaǵa ákep tasladı. Mensiregen hadal kewliń, al biraq, Mendey kórip súye almadı basqanı. Jigitke de jeńil emes ayralıq, Ishqı azabı málim bastan keshkenge. Talay túnim ótti uyqısız qıynalıp, Seni haslan qıya almadım hesh kimge. Jaslıq ómir saǵan meniń janımdı, Sırlı altın jibi menen ıshqınıń – Tikkenligi sonda ǵana tanıldı, Úze almadım umtılsam da kúsh qılıp. Etegińe ergen shóptey qaltırap, Kewlim saǵan erdi, rahim etpediń. Bar sulıwlıq nurıń menen jarqırap, Mákkar kúlkiń kóz aldımnan ketpedi. Ishqı, - bódene emes, úrikken waqtıńda Bezetuǵın uya salǵan jerinen. Kóp oqıdım ıshqı, ayralıq haqqında, Seniń dártiń ótti biraq bárinen. Uyqı ornına sen jaylastıń kózime, Ayıplawǵa tilim, biraq, baspadı. Ne shara bar, ushqalaq qız ózine Hámir etse «súyeseń» dep basqanı? Júrdik sóytip, al ne boldı keyninde: Mine, aldıma kelip tursań aylanıp. Qalay eken shıntlap súygen kewilge, Qalay, qoshshım, ańsat pa eken ayralıq? Men ósh alar edim házir, egerde Sendey kórip súye alsam ózgeni. Lekin adam óz baxtına teber me, Óz baxtımdı jek kóriwge tózbedim. Taza júrek taza tálim sebedi, Muhabbattı alday almas saylı jas. Súysek, usılay shın súyeyik, sebebi, - Shıntlap súygen kewil haslan aynımas.