Sazan aw

Tabanımdı tas qoparıp, Túserme dep sazanlar, Saldım seni kólge aparıp, Qaynarma dep qazanlar. Qarap kórsem búgin barıp, Sazan túwe shabaq ta joq. Qara suwdı keldim jarıp, Emes meniń qarınım toq. Seni salıp qara suwǵa, Hesh bir payda tappadım, Oqtı atıp ushqan qusqa, Onı da hesh jarıtpadım. Ármanım kóp kewlimde, Sazan balıq túspedi, Qayıstırdı qayǵı meniń, Hesh bir isim ónbedi. Biziń talap kelispedi, Qansha ǵayrat salsamda, Ilgerilep is ónbedi, Mudam taqqa tursamda... Ne bolǵanı talabıma, Qır shıǵadı udayı, Jalǵız balıq bolmasa da, Iǵbalıma shıdayın. Qayıǵım joq, jeken salda, Tayanaman tayawdı, Basqa nárse joq ǵoy qolda, Salmasam da tayawdı.