Axmaq Patsha

Ótken kúnlerge qarasam, Bilgenlerden sorasam, Aytqan sózlerin tıńlasam, Kóp álamat bolǵan eken. Birewler jılap udayı, Qırın qaraǵan Qudayı, Túsip ıǵbal abırayı, Ishi dártke tolǵan eken. Shaǵına jetpey shalıǵıp, Shıbın janın otqa jaǵıp, Kózinen qanlı jas aǵıp, Ómiri zaya ótken eken. Dushpanına sırın aytpay, Kelgen jerde sózden qaytpay, Dostı kúldirip muńaytpay, Ne bir martler ótken eken. Qarıwlanıp kùshin jıynap, Arı ushın janın qıynap, Xalqınıń kóz jasın tıyıp, Ne hasıllar ótken eken. Alınbay adam emespa, Shıday almay bul azapqa, Nalet aytıp biyinsapqa, Xalıq shuwlap posqan eken. Ala jip salıp moynına, Kóz jası tolıp qoynına, Túsip sayıllıq jolına, Asan qayǵı ótken eken. Zapıran bolıp júzleri, Jawdırap eki kózleri, Tıñlanbay aytqan sózleri, Jiyrensheler ótken eken. Qayǵı bolıp xannan sıyı, Qazan kibi qaynap miyi, Isherge tamaq, joq úyi, Sansız xalıq posqan eken. Teńlik tappay, qorlıq penen, Kórer kúni tarlıq penen, Erki ketip zorlıq penen, Kóbi aydawda júrgen eken. Sol qorlıq azap arılmay, Zalımnıń tańı tarılmay, Qara bult qaqqa jarılmay, Bul zamanǵa jetken eken.