qosıq
Qashan ráhátlanadursań
Berdaq Ǵarǵabay ulıIlme ǵayıptan sóyleme,
Kisiniń yarın gózleme,
Miynetsiz dúnya izleme,
Jandı otqa saladursań.
Talap islep tap dúnyanı,
Sútten aqdur, bilseń anı,
Kóp etseń, óziń gúnanı,
Jaman atlı boladursań.
Ózińnen páske júz salma,
Namáhremlerge kóz salma.
Kisi yarına, sóz salma,
Óz yarińnan qaladursań.
Jas ellide pirden qaytpa,
Tawıp ayt, sózdi molaytpa,
Dostıń sırın, dushpanǵa aytpa,
El buzıwshı boladursań.
Er bolsań, elińdi baqla,
Eldiń bergen duzın aqla,
Dostıń sırın bekkem saqla,
Elge ırza boladursań.
Bolay deseń elge mırza,
Ellerińdi qılǵıl ırza,
Ǵáriplerge berme ıza,
Óziń zıyan qıladursań.
Duwrı tutsań niyetińdi,
Xalıqqa bursań betińdi,
— Sıylasań ǵárip-jetimdi,
— Shın azamat boladursań.
Peyliń ketip, nápsińdi ashpa,
Malım bar dep, tolıp-taspa,
Jarlını ayaqqa baspa,
Sen de jarlı boladursań.
Qolıń úzbey el-elattan,
Qashıq júrme jámáátten,
Qashar bolsań, qash ǵıybattan,
Ǵıybat jaman, biledursań.
Miynet penen jandı qıynap,
Kórmey, bir kún, qonaq sıylap,
Ishpey-jemey maldı jıynap,
Qashan ráhátlanadursań?