Izler Edim

Joǵımnan tappadım dárek, Sárdarımdı izler edim, Men sorlıǵa dáwran kerek, Dáwranımdı izler edim. Zaman neshik zaman boldı, Qaraǵay basın shortan shaldı, Dúnyadan kóp kewilim qaldı, Qardarımdı izler edim. Haqqa nalish eteyin men, Ótirik aytip neteyin men, Xalıqtı izlep keteyin men, Bir imkanım gózler edim. Uzaqta qawmi-qardashım, Ne sawdaǵa tústi basım, Márt jigit bolǵay joldasım, Qáwenderim izler edim. Jarılqaǵan alla-taala, Adamlardi kórme ala, Kimler pasıq, kimler aǵla, Anı bilip izler edim. Birikkende eki arıs, Aytar edik álhabbız, Júregi misli jolbarıs, Naǵız sherdi izler edim. Eger tapsam ol sherlerdi, Ózgerter edim túrlerdi, Gúlistan etip jerlerdi, Dúnya júzin izler edim. Aǵa-begler bolmań qapa, Súrip besh kún zawqı-sapa, Shekken bolsań jábiri-japa, Saǵan dárman izler edim. Berseler alla dadımdı, Esitseler páryadımdı, Shad áylesem elatımdı, Dártke dawa izler edim. Qam sút emgenmen anadan, Bir ushqan kózsiz sonaman, Soǵan dım kúyip janaman, Jaqtılı jol izler edim. Jolınan adasıp qalǵan, Móhminlerge sárdar bolǵan, Ǵárip-qáserdi qoltıqlaǵan, Miyrimlini izler edim. Sozsam qolımdı hawaǵa, Dártim dus kelse dawaǵa, Ketsem bumannan Kaabaǵa, Tabar bolsam izler edim. Kópti kórgen qariyanı, Aqtarıp paniy dúnyanı, Keship teńiz hám dáryanı, Men joǵımdı izler edim. Qoyandı óltirer qamıs, Jigitti óltirer namıs, Edige menen Alpamıs, Tirilse, men izler edim. Shar kitaptan tura qashtım, Nawayıdan sawat ashtım, Fizuliyden dúrler shashtım, Dilwarlardı izler edim. Maqtımqulını oqıǵanda, Aytar edim hár zamanda, «Kemis bar ma begler onda?» Sózin tawap qılar edim. Men sharıq urıp Shamǵa ketsem, Bilgenimdi bayan etsem, Haslı ǵayrı elge jetsem, Qanday mádet alar edim? Berse maǵan Daǵıstandı, Túsirse de zimistandı, Jaqsı dese Hindstandı, Joǵım izlep keter edim. Bendem dese biysharanı, Tárk áyleyip bu káranı, Men aqtarıp Buxaranı, Luqmanımdı izler edim. Xalqım ushın salıp kúshti, Alıwǵa zalımnan óshti, Aralasam Úrgenishti, Yaranımdı izler edim. Joldas ertip jolǵa shıqsam, Jayhunde sal bolıp ıqsam, Yaqshılardıń awzın baqsam, Aytar sózim tabar edim. Ótken Arastu, Aplatun, Jaratıp ilimniń kántin, Sheshiw ushın pikri bántin, Men maǵrifat izler edim. Tórt nárse dúnya tórkini, Áwel haq, insan bil bunı, Bul dúnyanıń joqdur mini, «Baxıt bol!» — dep izler edim. Bedil, Áttar, Bidayattı, Tákirarlap atırdım tańdı, Zaman qıynap tur adamdı, Hidayattı izler edim. Bir sebepker jalǵız alla, Ferdawsiydey dana bar ma? Túsindirer «Sharqıy molla», Men alımlıq izler edim. Qarataw qarsımnan kelse, Aydarhası adam jese, Sol jerde joǵıń bar dese, Men taysalmay tartar edim. Qulaq sal meniń sózime, Sarǵısh enip tur júzime, Mádet berse haq sózime, Isim rawaj áyler edim. Haqqa ásilik áylemespen, Dánekersiz júylemespen, Hasla jalǵan sóylemespen, Duwrılıq sóz sóyler edim. Maǵrıpqa-mashrıqqa, Arqa menen qublaǵa, Adım urıp tórt tárepke, Júrsem ózim izler edim. Berdimurat izle-izle, Haq jolını tuwrı gózle, Kóp ishinde jaqsı sózle, Sózdiń parqın biler edim. Berdimurat haqtıń qulı, Sahrada ósken búlbúli, Bul bir aytqan hikayatı, Sıyır emes dońız jılı.