qosıq
Aq altınlı eldiń aqsaqalları
Ibrayim Yusupov(Respublikalıq xalıq xojalıq islerine óz tilegi
menen belsene járdemlesip jurgen pensioner
otaǵasılardıń húrmetine)
Xalıq shaqırsa jatpas namıs-arlılar,
Qıymıldasar jetkeninshe halları.
Jigitke bergisiz ǵoshshaq ǵarrılar -
Aq altınlı eldiń aqsaqalları.
Jigitlik ótkensoń, ǵarrılıq murat,
Káxudalıq sóziń jurtqa wásiyat.
Toplımǵa kóp túsken ǵayratlı ǵıyrat,
Dúbir sezse, jelge tarar jalların.
Jigitlikte hár kim esirik nar bolar,
Qayda kıyqıw bolsa, sonda bar bolar,
Xalqı is buyırsa tındırar bolar,
Eske túser sol ǵayratlı jıllarıń.
Talay at boldırdı shabısıńızdan,
Talay beller sındı tebisińizden,
Qazan zorǵa qaynap tabısıńızdan,
Kóp bolǵan kewildiń qıylı - qalları.
Pursat bermey tal boyıńdı jazıwǵa,
Ákeńniń ornına kettiń qazıwǵa.
Qattı shańǵalaqtı salıp azıwǵa,
Shaqsań, push bop shıqtı jaslıq ármanı.
Aydasańda baydıń qosın, arbasın,
Biymillet ishkizbey suyıq jarmasın,
Qız-kelinshek ayta ǵoysa harmasın,
Ash qarındı toydırǵandı palları.
Onseri bel menen siyseri ketpen,
Jantaq dásteletip, tomar gewletken,
Kegeyli, Esimjap, Xanjap, Qızketken,
Talay qazıwlardıń boldıq beldarı.
Sonnan ayaq basıp jańa turmısqa,
Qatnasqansız qansha ullı qurılısqa,
Kimińiz Watandı qorǵap urısta,
Kimler, awır tıl arbasın aydadı.
Is gezegin endi jaslarǵa berip,
Dem alsańlar eldiń ziynetin kórip,
Baxıtlı ǵarrılıq dáwranın súrip,
Házlesseń, kelinniń tayar shayları.
Biraq diyqan biyǵam shalqaya bilmes,
Miynet súygen adam qartaya bilmes,
Jambaslap kórmegen jantaya bilmes,
Otırsa aldına sıymas qolları.
Ǵarrılıqtıń dárti sizge juwımas,
Tamırıńızda diyqan qanı suwımas.
Jerge hám miynetke oyatar ıqlas,
Shamurat atanıń órnek jolları.
Jas áwladlar maqtanadı siz benen,
Shawlıq súyip, shaǵlań jarqın júz benen.
Aman bolıń kempirlerińiz benen,
Aq altın eliniń aqsaqalları.
1976