qosıq
Kreshshatik kashtanları
Ibrayim YusupovGúlleri bar shoǵırlasqan,
Misli Kreml shamları, -
Kórgenińde zeyiniń ashqan
Kreshshatik kashtanları.
Kórmegen edim Kievti,
Ál hawaǵa ol tiyipti.
Jaslıq lipasın kiyipti
Kreshshatik kashtanları.
Usı jerde qanlı sawash
Bolǵan deseń hesh inanbas,
Bári sulıw, bári de jas
Kreshshatik kashtanları.
Aldımda keń kóshe jatır,
Ájayıp amfiteatr.
Qatarlasqan qalıń shatır –
Kreshshatik kashtanları.
Sayańda sayranlap áste,
Keldim sizge kúnde keshte.
Siz bálentte, jollar páste,
Kreshshatik kashtanları.
Shadlı dáwran bunnan birdey
Tolıp aǵar Dneprdey.
Qulpırǵan qızıq ómirdey
Kreshshatik kashtanları.
Skamyańa barsam jaqın,
Esittim ashıqlar «ahın».
Saw bol tuwısqan dárgahım,
Kreshshatik kashtanları.
Japıraǵıń jaynap sonday,
Urısqa nálet aytqanday.
Ukrainanıń jaslıǵınday
Kreshshatik kashtanları.
Mákanımsań shın bawırman,
Sayańda sayranlap turman,
Janım qurban, janım qurban,
Kreshshatik kashtanları.