Men súyemen qırǵızdıń Ala tawın

Nıq tartıp aq boz úydiń úzik bawın, Tábiyat toylap atqan gúren awıl... Adamzattıń bir biyik ármanınday, Men súyemen qırǵızdıń Ala tawın. Kewlime men Toqtaǵul, Shıńǵız bolıp, Qıyalım gúl teredi bir qız bolıp, Ala taw, seni kórsem, quwanǵannan— Kete jazlap turaman qırǵız bolıp. Óytkeni, bul tawlardıń hár tóbesi Tuwısqanlıq, doslıqtıń «nar tóbesi». Jasasın Alatawdı biyikletken Qırǵızlardıń leninlik mártebesi! Taw berip, ırıs qımızın aqtırar ma, Ol tawdı ıǵbal nurı jaqtırar ma, Jer sulıwı, el baxıtı egiz kelip, Gez kelgenge bul baxıt taptırar ma. Betondı asaw suwǵa noqta qılǵan, GES leri toq juwırtqan Toqtaǵuldan. Jılqısı suwǵa qosa juldız iship, Qoyları taw bultınday aqtarılǵan. Tuwısqan el baxıtı zeyin ashıp, Shıń basında quyashqa jaqınlasıp, «Jasasın jańa zaman, jańa adam!» Dep baqırǵım keledi kewlim tasıp. Zamanlarda túrli kóz qaras bolıp, Ne dáwirler ótpedi talas bolıp. Ala taw, mıńlap jıllar qırǵız seni Qorǵaǵan qudiretli Manas bolıp. Tar keshiwde qarsı alıp talay jawdı, Xalıq tawdan, taw xalıqtan pana tawdı. Qırǵızdı taǵdir taslap ketkende de. Qırǵız taslap ketpegen Alatawdı. Bul tawlar endi kórseń baǵı-bostan, Máńgilik baxıt, shadlıq, otar basqan. Tawǵa jaǵıp kommunizm shamshıraǵın, Gúrkirey ber, sovetlik Qırǵızstan! Alarsha suw gúrildep tasar eken, Atlı qızday sıńqıldap qashar eken, Ala taw nege sonsha sulıw desem, Qırǵız degen sulıw xalıq jasar eken. Ala taw, sen dúnyada bir ekenseń, Taw bolıp uyıp qalǵan ır ekenseń. Qulap ketpey seni qaytip tur desem, Qırǵızlarǵa súyenip tur ekenseń.