qosıq
Nawayıǵa
Ibrayim Yusupov(Shayırdıń 500 jıllıq merekesinde oqılǵan qosıq)
Sen ármansań shólge pitken baq bolıp,
Sayalı, miywalı bir daraq bolıp.
Zamanlar dawılı shayqaǵan sayın,
Jamalıń qulpırǵan zerbaraq bolıp.
Jeti ıqlım gúzarında bir gúmbez,
Dáwirler apatınan jıraq bolıp, -
Ol turar. Óter ózimshil patshalar,
Dúnyaǵa jaqsı-jaman qonaq bolıp.
Turdıń jaqtırtıp gózzallıq álemin,
Qarańǵıda janǵan shamshıraq bolıp,
Áwladlar kewli ashıqdur diydarıńa,
Janı jolıńızǵa japıraq bolıp.
Sahra gúllerin shashayın ústińe,
Nawayını súygen qaraqapaq bolıp.
Ibrayım der, ullı ruwhıń aldında,
Bas iyeyin shákirtiń Berdaq bolıp.
1968