Ózbekstan

Sáyir etip men sáhár waqta, Kirdim bir ájayıp baǵqa. Japıraq jamılıp awlaqta, Búlbillerge sır sırlastım, Samal menen sıbırlastım. Búlbil aytar: - usı bostan Meni tarttı ozal bastan. Sol ushın da bir tınbastan Sayray-sayray esim keter, Háwes artar onnan beter. Samal aytar: -men sahradan Uyıtqıp shawıp kelsem mudam, Bul bostan naz etip maǵan, Juwasıtıp alar janım, Sáwir bolar boranlarım. Gúl júzinde shıq malınar, Alma aǵashtıń zarı bar: «Úz miywamdı!» - dep jalınar, «Sınıp ketpey turıp belim, Miywamdı úz - deydi - meniń». Shártek qayıstırǵan júzim Shirege más etip ózin, Qáreliler qara kózin Súzgende, ál qızıl ánár Ishqı otında kúyip-janar. Suw boyında májnún talı Sarhawızǵa shashın malıp, Bir shiyrin oylarǵa talıp, Láyli túskendey esine, Telmirer ay sáwlesine. Nawayınıń urpaqları, Qollarında tilla tarı, Qızǵın múshairaları, Jańa ǵazzel, jańa muqam, Bul májliske kirdim men hám… Sonıńday ájayıp bostan, Táriyp etsem tawsalmaspan. Perzentim dep qushaq ashqan, Ózge emes, óz janımsań, Gózzal Ózbekstanımsań! Gúrlep jatar Tashkentimiz, Shıǵısta zor dárbentimiz, Dúnyaǵa belli kántimiz, Kúnbatıstan, Kúnshıǵıstan Jolawshılar kóp ıǵısqan … Jaqsı isdur jáhán gezbek, Kóziń menen kórip, sezbek, Miyman ushın tuwǵan ózbek, Qonak kútiw - bul hám óner, Gúldey ashılar kewiller. Kel, biradar, sapar shekken! Jol bilmes dep taǵne etpeń. Jurtın súygen bir ózbekten Kem súysem men bul úlkeni, Qaraqalpaq demeń meni! Kelha miyman, tawlar jaqqa! Túseyik kiyik soqpaqqa. Misli qırmanlanǵan paxta Shıńlar ashıp aq siynesin, Alar kúnniń aqıl esin. Ótseń Kitab, Altın kólden, Andijan ya Mırzashólden, «Paxta bayramına» kelgen Misli «Báhár» ansambli Qulpırar aq altın gúli. Altın topıraq Ferǵanadan, Qaytıp shıqpas barǵan adam. Hár túp paxta, hár xanadan, Óner eldiń nesibesi, Paxtakeshtiń kásip, isi. Azat adam baxtı usında, Begabadtıń shaxtasında, Aqsham GES-ler jaqtısında, Burıp dáryalar iyrimin, Farhad tabar óz Shiyrinin. Bilgir ximik bulkáradan, Shırshıqtıń dańqı taraǵan. Gaz burqıldap Buxaradan, Kernep gáwmis trubalardı, Oralǵa otın apardı. Gires-gires kárwan, kóshler, Shım-shıtırıq relsler, Vagon vagonlardı tisler, Uzaq jollar bolıp qısqa, TU - lar ushar tumlı-tusqa. Tashkent tańı nurǵa tolar, Azat miynet tańı bular. Aǵar tasqın kolonnalar, Tashselmashtıń smenası Keler batıl qádem basıp. Súńgip qalıń japıraqqa, Jaslar barar TashGU jaqqa, Bilim gúllegen bul baǵda Iske asıp turǵan bári - Uluǵbektiń ármanları. Ullı sháhár ortasında, Jas gujimler arasında, Fontan atılıp qasında Ozıq óner saxnası tur, Misli ashılǵan qızıl gúl. Saz qumartıp kelseń izlep, Frak kiygen sáteń ózbek. Yoshıp, orkestrdi gózlep, Shıbıǵın bir siltep endi, Gúńirenter Betxovendi ... Doslıq, baxıt, erik quyashaı Turar máńgi nurın shashıp, Ishi kúygen duz jalasın! Ómirimiz bar baǵı-bostan, Saw bol, anam Ózbekstan!