Jaylawım

Ata jurtım Túrkstannan kelgeli, Ata-babam qonıs basqan jaylawım Anadan tuwǵalı esim bilgeli, Oynap qatar ósken qalıń, jaylawım. Kún boyına bayır etip turaqlı, Men ketermen árman bilen jıraqlı, Qamıs orıp altaw-jetew oraqlı, Teristóbe, Uzınqayır, jaylawım. Ólim xabarınan kelmegey saza, Endi aytayın sózdi amanlıq taza, Erjan ataw menen shıǵısı Írza, Teńizlerden awqat etken, jaylawım. Balıq awlap, Toqtas, Mantıq boyınan, Balıq shanshıp jazda júrgen oyınan, Shanshıp saylap júrip jayın moynınan, Ata-babam awqat etken, jaylawım. Alasat tabılsa barlıq el kósher, Kóbeyip tur aramızda qan isher, Jetim jılap, ılaq mańırap kún kesher, Árman bilen júrermen be, jaylawım? Jaylawım Jalayır, kópir hám bóget, Suw keler me degen bizde bar úmit, Shaqaq urar aqır bir kún qız-jigit, Árman bilen qayǵıda ósken, jaylawım. Áwel-há óskenim Kókózek boyı, Adamnıń jeter me shuǵılǵa oyı, Puqaranıń taymaǵaylar tap-kúyi, Árman bilen ósken arzıw, jaylawım. Bekban shaǵıl, Jańa suwdıń boyları, Sharqırawıq, «Múyten bóget» jayları, Jayılǵan baylardıń sansız qoyları, Kózime totıya júrgen, jaylawım. Kólsaǵa, Ayırsha, Terbenbes teńiz, Ásirese Ayırshada óskenbiz, Birikkende kókeylerin keskenbiz, Árman bilen ayra túsken, jaylawım. Jaylawım jay edi málim hámmege, Quda baxıt bermedi me bizlerge, Hásiretiniń daǵı endi júzlerge, Árman bilen qalarmısań, jaylawım.