qosıq
Nege kerek
Kúnxoja Ibrayim ulı 1
Sayraǵan búlbúli bolmasa,
Ishi hawazǵa tolmasa,
Bárqulla jaynap turmasa,
Ashılǵan gúl nege kerek?
Sarqırap suwı aqpasa,
Ekken eginler qanbasa.
Waqtında tasıp tolmasa,
Aqqan suwlar nege kerek?
Uzaqtan kózge túspese,
Shamalı qattı espese,
Tóbesi bultqa tiymese,
Asqar tawlar nege kerek?
Jadırap jazı bolmasa,
Shuwaqlı kógal qılmasa,
Óz waqtında jawmasa,
Qara jamǵır nege kerek?
Kórgen nárseni almasa,
Pátlenip qanat qaqpasa,
Joq jerden ańdı tappasa,
Qarshıǵa qus nege kerek?
Qarasın úzip ketpese,
Artıqsha qarıw etpese,
Qashaq qoyanǵa jetpese,
Qayıń tazı nege kerek?
2
Ozalda tósin kermese,
Tańlap jemlerin jemese,
Bayraqtan ozıp kelmese,
Dal bedewler nege kerek?
Bellerin bekkem buwmasa,
Ótken óshlerdi quwmasa,
Anadan artıq tuwmasa,
Pasıq perzent nege kerek?
Boyı kún sayın óspese,
Dushpan kókeyin kespese,
Taymay gúreske túspese,
Qorqaq palwan nege kerek?
Xalıqtıń arın arlamasa,
Barı-joqtı barlamasa,
Ash hám toqqa qaramasa,
Awan basshı nege kerek?
Xalıqqa ádil bolmasa,
Jılaǵandı jubatpasa,
Xalıq tatqandı tatpasa,
Taxt iyesi nege kerek?
Eki jaqtı teń kórmese,
Tuwrı tórelik bermese,
Ádillik penen sheshpese,
Kátqudalar nege kerek?
3
Ashqa qayırı bolmasa,
Mayǵa qarını tolmasa,
Dúnyanıń júzin sholmasa,
Asa baylıq nege kerek?
Dáryaday tolıp taspasa,
Kún sayın kúshi aspasa,
Eldi jawlardan baqpasa,
Qurı batır nege kerek?
Ata-anasın kútpese,
Aytqanlarına kónbese,
Ata-anam demese,
Jaman perzent nege kerek?
Kúndey kúlip jaynamasa,
Búlbúl bolıp sayramasa,
Quwanısıp oynamasa,
Quw ómirler nege kerek?