Kók ózek

Aq qaǵazǵa sóz marjanın jazayın, Jermen zalımlardı xatqa salayın, Kók ózekti terip etip jırlayın, Basıńnan dáwranıń taydı Kók ózek. Zalımlar júripti ashlardı awlap, Iyshan, molla, biy-atalıq masayrap, Ash xalıq júr nan tabalmay jayrap, Ata mákan zindan boldı Kók ózek. Kók ózek jerleri ónim bergendey, Báhár bolsa dóner monshaq dizgendey, Jerleri anqıǵan xosh iyis guldey, Basınnan dewranıń taydı Kók ózek. Kók ózek boyları — sharwa jayları, Qońıs bastı ata-baba zúriyadı, Onda uzaq erkin jasap turmadı, Ata-baba qońıs basqan Kók ózek. Kók ózek boyları pitken qamıstı, Kók ózekten suw ketkeni namıstı, Ultanında at shabısıp qaǵıstı, Basıńnan dáwranıń taydı Kók ózek. Kók ózek boyında ráhát qurdım, Eki jıl barmasam ópkeler jurtım, Elatım múytendi, Ótesh dur atım, Arzıw-arman menen qaldıń Kók ózek. Kók ozektiń ultanların jaylagan, Tilge kelse, adamzattı taylaǵan, Xalıqtı buldirip qolın baylaǵan, Molla Izimbetler bizde, Kók ózek. Kók ózektiń eki boyı qayırdı, Zalım biyler Kók ózekten ayırlı, Ash xalıqtı qıynaw menen mayırdı, Basıńnan dewranıń taydı Kók ózek Kók ózek degende etim shım etti, Kózimniń jasları irkilmey ketti, Zalım atalıqlar wayranlar etti, Basıńnan dewranıń taydı Kók ózek. Bizlerdi zalımlar zar-giriyan etti, Jetim-jesir jılaw menen ol ketti, Neshsheni hár elge ten-tene ótti, Arzıw-árman menen qaldıń Kók ózek. Jaylawım Kók ozek qıyalay keshtim, Qolımda oraǵım kóllerge tústim, Kók ózekten barıp suw alıp ishtim, Basıńnan dáwranıń taydı Kók ózek... Jazlawım Jańa suw, qıslawım Samay, Ustińnen el keshti bir adam qalmay, Suwın ashıp, seniń daqılıń bolmay, Basıńnan dáwranıń taydı Kók ózek. Jańa suw tubine tayaw boylamas, Istiń sońın, keleshegiń oylamas, Suwıń ashshı, sharwa seni jaylamas, Basıńnan dáwranıń taydı Kók ózek, Taqır qoldiń ultanların suw aldı, Gapqıllasqan órdek penen ǵaz qaldı, Egin egip, diyxanshılıq kóp aldı, Basıńnan dáwranıń taydı Kók ózek.