Bardı

Urıwım — Qońıratdur, milletim — qalpaq, Keneges, mańǵıtı, qıtayı-qıpshak, Tuwısqan deydiler qalpaǵı-qazaq, On tórtke belingen urıwım bardı. Bir eli — Xorezm, bir eli — Tuwran, Urgenish, Qońıratıw, sháxri Samarqan, Kárwanları barur Buxar, Ashtarxan, Ne bir sulıw-sulıw shexerim bardı. Siziń jaqgan kórkem anıń dalası, Kabat-kabat salınǵandur qalası, Kókbarıw-ılaqqa keńdur arası, Kókbar, ılaq, oynar yigiti bardı. Biziń eldi on tórt urıw diyerler, Qız-jawanı qızıl-yashıl kiyerler, Xaytta, toyda at arbaǵa minerler, Nebir gózzal sulıw qızları bardı. Qız-jigiti juwap aytar dásme-dás, Kiygen kiyimleri atlasıw-lipas, Astına tósener meshxediy palas, Shaxsanem, Shiyrindek qızları bardı. Kátipleri alar kitap, qálemin, Bir-biriná berur tánir sálemin Xoja Xafız, Nawayıday sabaǵın, Alan neshshe alıp, kótibi bardı. Ush ay shabaǵı bar, ush ay sawını, Ush ay qabagı bar, ush ay kawını, Tórt máwsimá etar anıń tahámı, Nebir shiyrin-shiyrin jemisi bardı. Biri sutilmekdur, biri átshoqay, Sobıǵın jeseńiz sheker áseldey, Jambılsha, kawını, shiyrin peshektey, Jılına ush piser miywası bardı. Bas qala diyerler áyyemde Tuwran, Iba-izzet bilen qıladı miyman, «Kelgindi» degen at bizgedur jaman, Qıtay, Qońırat atlı ellerim bardı. Jáyxun, Sayxun eki dárya arası, Tup saǵamız bir kisiniń balası, Ánes, Málik — eki eldiń arası, Atı qaraqalpaq ellerim bardı. Biziñ elge erte kelur bahar-jaz, Ǵanqıldasıp kuwı-ǵazı salar saz. Bul bayazdı yazǵan molla Hájiniyaz, Ziywardıń girdeli elleri bardı.