Bozataw

Keter boldıq endi bizler bash alıp, Xosh aman bol, bizden qaldıń, Bozataw, Xoshlasalı qara kózge yash alıp, Xosh aman bol, bizden kaldıń, Bozataw. Jer hám el bilendur, el hám jer bilen, Jersiz eldiń, kuni dárba-dár bilen, Ómiri óter júrektegi sher bilen, Kádiriń seniń bizge etti, Bozataw. Yoq edim, bar boldım, kámala keldim, Minip árebi atlar, dewranlar súrdim, Nanıńdı kóp jedim, ráhátin kórdim, Xosh aman bol, bizden kaldıń, Bozataw. Neshe waq jaqsıǵa hám sáxbet boldım. Shadı-xurram bolıp, oynadım kúldim, Dushpanlar jábridin ketermen boldım, Xosh aman bol, bizden qaldıń, Bozataw. Sen baǵ ediń, búlbil ushtı, zaǵ qaldı, Putkil siynem jandı, ishte daǵ qaldı, Qıysık Porqan aman, seni jaw aldı, Bası qutlı sonı wáyran, Bozataw. Kimseniń anası, kimniń ámmesi, Kimseniń aǵası, kimniń inisi, Kimseniń qız-uǵlı, kimniń sińlisi, Ótirek, Gurgen, Xajar astı, Bozataw. Kimseniń qız-uǵlı, arzıwlı yarı, Kimniń qashı qara, kózi xunqarı, Ásir bolıp, telmirisip xár sarı, Yıqlap at aldına tushti, Bozataw. Atadan ayrıldı gulpaqlı urlan, Satıldı, xur basın áyledi gulam, Kimler Irak, ketti, kimler ketti Sham, Kimseler Gurd, Tehran tushti Bozataw. Kimseniń qardashı, urıl hám qızı, Tutıldı kun bilen ayıw-yuldızı, Xárir atlas kiygen kimniń yalǵızı, Zalımar álgine tushti, Bozataw. Qara koz, qıpsha bel qız bilen jawan. Yuzleri gul kibi, kózleri mástan, Quda ómiri bilen bardılar Balqan, Dáwlet qushı sendiń ushtı, Bozataw. Kirpigi — oq, anıń qashları — kaman, Yuzleri — qırmızı xurshiydi taban, Láyli — Zuleyxadek ne gózzal jánan, Ásir bolıp qolǵa tushtı, Bozataw. Sáxer waqta qırlı dupen atıldı, Bende bolıp tushtim, qolım shatıldı, Páriydek qız shorı bolıp satıldı, Kániyzliq bashına tushti, Bozataw. Qala buzıp turkmen bagrım daǵladı, Kimseni dupenlep, kimdi baǵladı, Sende kóp musılman uǵlı yıǵladı, Bashıńa qıyamet tushtı, Bozataw. Kimse sháxiyd boldı, jandın ayrıldı, Kimse gáda boldı, maldın ayrıldı, Kimse kózi qunqarıdın ayrıldı, Bashına qıyamet tushti, Bozataw. Tógdir — alladandur, sebep — Qońırattan, Biyráxim Seyilxan degen elattan, Ayra tushtiń ashamaylı-qıyattan, Elatsız, jaylawsız qaldıń, Bozataw. Er yigit bashına mushkil is tushti, Jurek baǵrım ǵamın otına pishti, Elatın ustindin serpilip kóshti, Xosh aman, bol, bizden qaldıń Bozataw. Kózim yashlı, men ketermen, sharam yoq, Bir qudadan basqa pushtı-panam joq, Hámme ketti, sende turar adam yok, Xosh aman bol, bizden qaldıń Bozataw. Qala bası boldıń sen molla Pirim, Óziń tálip-ilim, kóńlińde kiriń, Qońırat balandı alsa, ol hám óz birin Xosh aman bol, bizden qaldıń Bozataw. Mámbetmurat diywanbegi qul boldı, Jan-iymanı, muddaxası pul boldı, El qarap bolmaqqa sebep shul boldı, Xosh aman bol, bizden qaldıń Bozataw. Ziywarıń xoshlasar qádirini bilip, Kózini yashartıp, baǵrını tilip, Aman bolsa, xal sorasar bir kelip, Xosh aman bol, bizden qaldıń Bozataw.