qosıq
Alarsha
Ibrayim Yusupov- O, taw suwı, nege bárhama
Shala ókpe bolıp shabasań?
Kóksińdi sen qıya taslarǵa
Urıp,
Urıp,
Urıp aǵasań?
- Men tákabbır sulıw qız edim,
Jigitlerdi mise tutpaǵan.
Bir jigitke men bılay dedim:
«Ket joǵal sen, kórinbe maǵan!»
Jigit mıyıq tarttı bir kúlip,
Basqalarday ashıwlanbadı.
Qız kewliniń sonshelli biyik,
Sonsha názikligin ańladı.
Hám esittim alıs tawlarda
Qorǵap meniń qız namısımdı,
Jalǵız qarsı shıǵıp jawlarǵa,
Meni oylap júrgen dep muńlı.
Kórdim sol jigitti túsimde:
Jaralanıp qulaptı attan,
Onday bolıp meni hesh kim de
Súye almasın men ańlamappan.
Bir basına awır kún tuwıp,
Jatsa kerek dalada qashshan.
Sol jigittiń jarasın juwıp,
Sol jigittiń bir shólin bassam.
Sol ushın da sekirip jarǵa,
Órden ıqqa qaray shabaman,
Aq kóksimdi qara taslarǵa
Urıp,
Urıp,
Urıp aǵaman
1975