qosıq
Ámiw jaǵasında jaynap turarsań
Ibrayim Yusupov(Taqıya tas gidrouzeliniń ashılıw saltanatında oqılǵan qosıq)
Ullı qurılıs—abadanlıq tarnawı,
Irıs qazanınday qaynap turarsań.
Biz dóretken dáwran bolıp nurlanıp,
Ámiw jaǵasında jaynap turarsań.
Ayańıń tirelip aydın kóllerge,
Ataǵıń jayılıp elden ellerge,
Ábihayat suwın berip shóllerge,
Baxıt bulaǵınday haǵlap turarsań.
Mártler quyǵan seni dárpenbes tastan,
Turarsań kóp dáwir ótmrip bastan.
Suw haqqında sen bir ájayıp dástan,
Dáwirimizdiń dańqın jırlapturarsań.
Serleseń xorezm shahlardıń waqtın,
Suw qıt bolsa taslap qashtılar taxtın,
Tariyxın tıńlasań qaraqalpaqtıń,
Suw boyında «suw» dep shırlap turarsań.
Suw—bul ullı tariyx, tamırı arıda,
Suw bolǵan xalıqtıń ahıw-zarı da.
Hátteki Berdaqtıń qosıqları da
Ele suw soraydı, tıńlap qarasań.
Lenin edi xalqıma jer, suw bergen,
Oktyabrden qaytıp óshpes nur bergen.
Sol sebepli, ullı qurılıs, bul jerden
Kósemniń atında arnap turarsań.
Minerseń Jáyhúndi jalınan qarmap,
Jigirma úsh toǵırtqadan sen harlap,
Qırqıwǵa aydalǵan qoyday toparlap,
Asaw tolqınlardı aydap turarsań.
Óriń Túyemoyın shalqarlı hawız,
Tınım tabar degish degen jalmawız,
Qaraqalpaq hám Xorezm, Tashawız,
Áspek etpey, kewlin shaǵlap turarsań.
Paxta káni bolar shólge suw barıp,
Jantaqlı dalada baǵlar ırǵalıp.
Altın kirpik aq salılar sallanıp,
Gúlte jońıshqa bolıp nurlap turarsań.
Óriń Tórtkúl, ıǵıń Qońırat bolıp,
Sen suw bergen jerler shın abad bolıp,
Gúlabı, gúrbegi, tornabat bolıp,
Shireń til ayırıp torlap turarsań.
Astıńnan Ámiwim aǵar sarqurıp,
Ústińnen poezdlar óter hayqırıp,
Nókisti abadan qántli jay qılıp,
Qutlı kárwanlardı jollap turarsań.
Dańqlı bes jıllıqtı dáramatınan,
Tuwısqan xalıqlardıń káramatınan,
Leninlik doslıqtıń sharapatınan
Demde gigant bolıp ornap turarsań.
Moskva hám Tashkent, Leningradı,
Bir jerde hámmeniń maqset-muradı,
Úsh mıń usta — qırıq millettiń áwladı,
Bárin bir semyaǵa jaylap turarsań.
Taqıyatas—nur qalası qoyınıń,
Mákanısań doslıq, miynet toyınıń,
Shamshıraǵı Ámiwdárya boyınıń,
Ullı islerge bel baylap turarsań.
Múlki bolıp Watanımnıń, ózimniń,
Kórki bolıp socialistlik dúzimniń,
Imaratı bolıp kommunizmniń,
Altın keleshekke sharlap turarsań.
Ǵarqalláziy suwǵa arnalar tolıp,
Sahralarda baǵı-bostan qulpırıp,
Leninge bir gózzal eskertkish bolıp,
Ámiw jaǵasında jaynap turarsań.
1973