qosıq
Ámiwdi atlaǵan jollarıń seniń
Ibrayim Yusupov(21-dekabr 1974-jıl Nókiske birinshi poezd kelgendegi mitingde oqılǵan qosıq)
Baxtıńıń bulaǵı burqıp saǵadan,
Kún-kúnnen uzayǵan qollarıń seniń.
Nókisime qut darıtar jańadan
Ámiwdi atlaǵan jollarıń seniń.
Ullı ırıs bar usı joldıń ózinde,
Tuwrı sarraslıq bar basqan izińde,
«Júriń, aparayın mánzilińizge»,
Dep shaqırıp turar jollarıń seniń.
Kóp zamanlar keshti jolı tar bolıp,
Kópiri pútin arba jolǵa zar bolıp,
Endi ne tileseń bári bar bolıp,
Dúnyaǵa tutastı jollarıń seniń.
El biykarǵa ertek yadlaǵan emes,
Ata-baba bosqa datlaǵan emes,
Dáryanı hesh dúldil atlaǵan emes,
Dáryanı atlaǵan jollarıń seniń.
Dańqlı Ózbekstan - altın dáwranım,
Tashkentten jollap tur qutlı kárwanın,
Shaǵla qaraqalpaq, pitip ármanıń,
Mudam qurǵınlasar hallarıń seniń.
«Beynew - Qońıratqa» shıqsań jaǵalap,
Azaw qazaq aǵayindi aralap,
Arqadan, qubladan tanabın orap
Máskewden tóteler jollarıń seniń.
Bul jol – biziń ármanımız ásirlik,
Kárwan kelse, júgimiz kóp tasırlıq.
Taqıyatas tarnawınan asırılıp,
Jáyhundı atlaǵan jollarıń seniń.
Bul jol xalıqtıń kútken dárkarlıq jolı,
Zamanıńnıń ullı ǵamxorlıq jolı,
Abadanlıq shadlı dáwranǵa tolı,
Shın doslıqtıń jolı - jollarıń seniń.
Bul joldı salǵannıń qolı gúl bolsın,
Xalqım, ırıs - nesibeń jáne mol bolsın.
Bul temir jol emes, altın jol bolsın,
Qutlı bolsın jańa jollarıń seniń!
1974