Sekretar

Náwpir suw saǵası tawlardan keler, Bálent shıńda bolar búrkit uyası... El basqarıw isi ol biyik hóner, Bar onıń diplomsız akademiyası. Úlken orkestrdi basqarıp twrǵan Dirijer bir tınbay sermeler qolın. Shıbıǵınıń ushında saz máwij urǵan, Mıń tar gúńirer bir Betxoven bolıp. Sol sırlı shıbıqtıń mánisin bilmegen «Ańsat talap ǵoy» dep aytısar onı. Al ol arpalısar bir dawıl menen, Sezer sıńsıp ketken jalǵan notanı... El sıylar basshını «yashulımız» dep, Basshıdan aybınıp qosshı albırar. «Jalǵan nota shertip qoyǵanlar» terlep, Byuro aldında turıp bası salbırar. Soǵan qarap kópler «úlkeygen ház» der, Birazlar biylikti etedi háwes. «Monamaxtıń bórkin» kiyiwdi gózler, Onıń awır kiyim ekenin bilmes. Bolǵısı kelgenler kóp. Biraq, partiya — Bes sawsaqtay biler óz soldatların. Eldi biylep erte biliw artına,— Sherte biliw demek júrektiń tarın. Kóremiz biz onı qurılıs basında, Awıl jollarında hám minberlerde, Jıynaqlı kabinette—isxanasında, Úlken máseleler qaralǵan jerde. Onı kútiwshi kóp sennen basqa da, Jumıs kúni bir sutkaǵa sıymaydı. «El taǵdiri» degen úlken mashqala Bes telefon bolıp birden shırlaydı. Birdi mıńǵa úlgi etedi serlep, Bazda iyni kelse qızıp ta alar. Asa sheshen de emes. Bazda keń sermep, Reglamentin ózi sozıp ta alar. Biraq gigant qurılıs hám atız jaqta Qızǵan ullı xalıqlıq miynet yoshınan Ruwhlanıp turıp sóylegen waqta, Ciceron bolıp tıńlatar saǵan. Qoltıǵıńa pitken ushqır qanattay, Máwjirtip tartqanday «baslı namanı», Dúbir sezip turǵan ertlewli attay, Aldıńa tartar ol bas ideyanı. Sen atlanıp jáne shıǵasań jolǵa... Ol biler: házirgi waqta adamlar Isin bahalasań basadı alǵa, Xoshemet buyrıqtan ótimli bolar. Ol biler: kóp kórgen bilimdan darǵa Kemeni qayırlatpay tayaw basqanın. Shet awıldan kelgen piyadalarǵa Ilich kaytip kúlip esik ashqanın... Basqarıw hám talant. Jolın uqqansız, Arnap tuwılmasańız da anadan. Sınnan ótip, siz ısılıp shıqqansız Lenin ashıp ketken ustaxanadan. Hámmege tep-tegis jaǵıw—qıyın is, Biraq xalıqqa unaw—eń baslı maqset. Basshınıń hár tapqır sózi berer kúsh, Jaqsı basshı—elge abıray, dáwlet. Siz hám injeneri adam janınıń, Derjavamnıń omırawlı balları,— Kommunistlik qurılıs frontlarınıń, Harmań, siz sawlatlı generalları! Tileymen sizlerge búrkit párwazın, Leninlik parasat zeyin tileymen. Ullı planlardıń shıńlıq salmaǵın Kótergendey mıqlı iyin tileymen!