qosıq
Men paxtakesh xalıqpan
Ibrayim YusupovDańqlı miynet nurı tamıp júzinen,
Óz kásibin jer jahanǵa tanıtqan,—
Qanday xalıqsań dep sorasa ózimnen,
Aytar edim:—«Men paxtakesh xalıqpan!»
Men ne deyin sizge paxtam haqqında,
«Aq altın» dep jurt at qoyǵan waqtında.
Paxtań seniń altınnan da zıyat dep,
Yashulınıń ózi ayttı jaqında,.,
Xızmet etsem eldi súyindiremen,
Aq altındı tawday úyildiremen.
Men dúnyanı jas kelindey jasartıp,
Hasıl lifas penen kiyindiremen.
Paxta haqqında sóyleseń de uzaq kún,
Jalıqpaydı adamları biz jaqtıń,
Men paxtadan kem súymeymen biraqta,
Milliardların ukrain, qazaqtıń.
Aq altın bul meniń ırıs bulaǵım,
Abırayım, nanım, báygim, ılaǵım,
Shının aytsam Abbaz shayır aytqanday,
«Paxta!» dese erbeńleydi qulaǵım.
Meniń qolım jerge jıllı tiyedi,
Jer de meni óz iyem dep súyedi,
Ana topıraq ıqlasımdı bahalap,
Shigit eksem, altın bolıp iyedi.
Men paxtadan dańq alıp, may shaynayman,
Jatsam-tursam paxta ǵamın oylayman.
Men qızlarǵa sırǵa soqqan zergerdey,
Hár túbine gúmis ǵoreq baylayman.
Qarshı menen Qaraqumdı qazǵanman,
Mırzashóldiń máńgi uyqısın buzǵanman.
Zaman ushın men anketa toltırsam,
«Paxtakeshpen» dep maqtanıp jazǵanman.
Házir maǵan pútkil dúpya túsindi,
Tábiyat ta moyınlaydı kúshimdi,
Mámleketim, húkimetim, bári de
Quwatlaydı meniń dańqlı isimdi.
Maǵan ullı húrmet qılar Moskvam,
Oral polat quyıp beredi mudam,
Mashinalar islep onnan Tashselmash,
Gruzin shay demlep tutadı maǵan.
Paxta dese quyash jaynap shıǵadı,
Paxta dese suwlar shólge aǵadı,
Shayırlarım paxta dese yoshlanıp,
Jurt tappaǵan sóz marjanın tabadı.
Men quyash mákanı Ózbekstanman,
Jer jahanǵa dańqı túsken bostanman,
Men paxtakesh degen ullı kásipti
Kosmos biyigine alıp ushqanman!
Men qaynar nápesli Turkmenstanman
Million tonnam menen úles qosqanman,
Paxtashılıq aydımların gilemge
Ǵayrınaǵıs oyıp jazǵan dástanman.
Men Pamirdin márti—Tájikstanman,
Talay dańqlı tabıs jolın ashqanmai.
Paxtashılıq dańqın jayıp álemge,
Nurek bolıp quyashtay nur shashqanman.
Men ataqlı aq qalpaqlı qırǵızban,
Alatawda jarqıraǵan juldızban.
Paxta dese Toqtaǵulday yoshlanıp,
Miynet súygish Manaslardı tuwǵızǵan.
Men aytıwlı Shımkentimen qazaqtıń,
Átirapım aq biydaylı uzaq tıń.
Paxta dese Balxash bolıp balqıyman,
Afort alma bolıp pisip shalqıyman.
Kásibi kóbeyip, qolı uzarǵan,
Men neftshi Azerbayjan—Hazarman,
Men Kavkazǵa qadap paxta bayraǵın,
Paxta dańqın tawǵa oyıp jazarman.
Qatarımnan qalmayın dep qıstanǵan,
Men Xorezm, Qaraqalpaqstanman.
Eń qıyın, eń salqın jerdi jibitip,
«Ellik» tey shóllerdiń sırıp ashqanman.
Aytshı dostım, qay juldızǵa ushasań?
Jollarıńdı aq lipasqa bóleyin.
Ay hám Jerdiń arasına keleplep,
Úzilmeytin órmek qurıp bereyin.
Aq altınǵa bóleyin keń aymaqtı,
Rahmet aytıp sizdey ul-qızǵa.
Paxtamnan toqılǵan qızıl bayraqtı
Tik aparıp jelbiretip juldızǵa!