Dala

Jawdırasıp júregimniń tórinde Irǵalar baxtımnıń roza gúlleri. Kúyremes ol saratannıń kúninde, Soldıra almas jabayı dúz jelleri. Tuwǵan jerge ıshqım suw berer oǵan, Japıraqların úmit tańlarım juwar. Kúndiz ol dolanıp quyash nurınan, Aqsham juldızlardıń ańsarı awar... Respublikam! Men sol shámennen saylap, Qızıl gúl ákeldim toyıń waqtına, Azat xalıqlar awqamında gúl jaynap, Máńgi shadlanǵaysań meniń baxtıma. Mudam aq bolsın dep nesip-ıǵbalıń, Aq gúllerden shashıw shashtım toyıńa. Miynet zawqı menep jaynap jamalıń, Ullı doslıq quwat bersin boyıńa. Sarı gúl degeniń zapıran túsli, Hesh kimge bermeyin, ózimde qalsın. Qulpırıp sarǵayǵan qumlardıń ústi, Dos kúlip, dushpanıń sarǵayıp talsın. Shaqır altın toyǵa, jay keń dasturqan, Pútkil Watan kelsin, kelsin doslarıń. Shaǵlay ber sovetlik avtonomiyam, Maqtanıshlı Qaraqalpaqstanım!