Jáne Jáyhun bolıp aqtıń da keldiń

Talay tulparlardı izde qaldırıp, Atlanıstan jáne waqtında keldiń. Tabıslarıń eldiń miyrin qandırıp, Jáne Jáyhun bolıp aqtıń da keldiń. Dańq, mártebeń asqar tawǵa teń, xalqım, Miynet dese túriniwli jeń, xalqım, Yoshıń seniń haǵlap aqqan Ámiwdey, Peyliń seniń Ústirtińdey keń, xalqım. Qalpaǵıń qap-qara, kókiregiń appaq, Sıy húrmet shapanı boyıńa shap-shaq, Saǵan ońay qara jerdi sóyletiw, Maǵan múshkil táriypińe sóz tappaq, Júziń seniń jarqıraǵan tań, xalqım, Azamatlıq iske qumarsań xalqım, Qara tawdı telejkaǵa sal dese, Telejka tartsa sen salarsań, xalqım. Miynet súygishligiń ayta júrgendey, Watan ushın jan ber dese bergendey, Seniń kommunistlik sana-sezimiń Bálentlikte biyik tawǵa mingendey. Dańq, saǵan quyashlı Ózbekstanım, Maqtanıshım, ana—topıraq bostanım, Aq altın patshası—ózbek aǵamnıń Húrmetnne bas iyemen, doslarım. Paxtadan hár gúzde bir taw úygenseń, «Aq altın» dep, laqap qoyıp súygenseń. Sen «paxtakesh» degen dańqlı kásipke Jańadan qosmoslıq máni bergenseń, Márt paxtakesh xalqım, harmań, barmısań! Altın Ferǵanada atqan tańbısań, Alıs joldan at qashırıp kelgende, Alǵı topta keler Ándijanbısań? Kúnshıǵısta dańqlı bas kentimbiseń, Gúrkiregen gózzal Tashkentimbiseń, Sawlatlı Samarqanbısań, yamasa,— Jizzakta jaynaǵan jas kentimbiseń? Sırdáryaǵa sırlas kewliń bar shıǵar, Tıńlardı tındırıp júrseń Qarshıda, Karaqalpaqpısań qatardan ozǵan, Qara tawdan túlep ushqan qarshıǵa? Sen Qashqadáryada ósken gúlmiseń, Ya Surxanda paxta terip júrmiseń, Namangannıń almasınday uwıljıp, Wádege opadar shiyrin tilmiseń? Jan qońsım Buxara, Xorezmbiseń, Bir-birewden kewil ǵarezimbiseń. Ullı Ózbekstan qırmanlarında Abıray ólsheytuǵın tárezimbiseń? Kim bolsaqta, biz paxtakesh elimiz, Paxtaday aq biziń aydın jolımız. Bir jaǵadan bas shıǵarıp birlesip, Bir jeńnen shıǵadı million qolımız. Bul qollar jer kewline jol tabadı, Shigit sepken jerden altın aladı. Mıń-mıń telejkalıq bir ullı korwan Ózbekstan jollarında aǵadı. Tariyx kórmegen bir zor kárwan kósher, Kárwan kóshken sayın qırmanlar óser, Pútkil dúnya bul qırmanǵa súysinip, Baqqanda basınan telpegi túser. Murın tawdan shıqqan biyhesap altın, Bahalap bile almas isińniń nırqın, El alǵısı, partiyanıń qollawı Saǵan mádet bersin, paxtakesh xalqım!