Sáwbet (S.Eralievke)

Súyinbay Eralievqa Ak qalpaqlı qırǵız ǵarrılarınday Tawlar sáwbetleser kól jaǵasında. Dáryalar gúrkirep, Samallar tınbay, Gúller sáwbetleser bulaq basında. Boy tasalap barıp tawlarǵa kúnde, Sol sáwbetke tınbay qulaq salıpsań. Birazlar gúńkildep jerde júrgende, Sen óz biyigińe minip alıpsań, Issıq kólge aqsham shomılıw ushın Juldızlar jılıslap túser biyikten. Tastan tasqa ırǵıp, Salqın suw ushın Bulaqqa urlanıp keler kiyikler... Sendaǵı bir zaman tús biyigińnen, Eki yosh perisi kólde dem alsın. Doslıq sáwbet atlı sırlı sháshmeden Kewil kiyikleri suw iship qansın. Urshıqtay zırlaǵan Jer daǵı jetim, Doslar ánjamın es biledi deydi. Juldızlar da shayırlardıń sáwbetin Ózine jubanısh kóredi deydi. Kel, bir sóyleseyik ráhátke batıp, Úrker tárezige tayalǵanınsha. Tas qalap, oshaqtı jaqtım mazlatıp, Otırayıq quslar oyapǵanınsha. Sáwbet ne haqqında bolsa da máyli, Dos qulaǵın túrse, sóylemshek hár kim, Sóz etip tawlardı, Pushkindi, aydı, Jańa qosıqlardan oqırmız bálkim… Seniń tawlarıńda, Meniń dalamda Sen hám biz shayırdıń sońı emespiz, Zor shayırlar keler áyne zamanda, Biraq biz hám eki aynalıp kemespiz. Ústimizden óter ullı qus jolı, Sháwketli juldızlar miriadası. Dáwirimiz ullı islerge tolı, Bálent párwaz eter kewildiń qusı, Óziń qan keshken sol qırǵın urıstan, Adamzat sabılıp shıqqannan keyin. Paraxat turmıstıń mánisin durıslap Uqtı pútkil tereńligine deyin. Planeta kishireyip oyınshıq sharday, Jayǵastı insannıń kewil xanasına. Pútkil dúnya bir pitpegen minarday, Aylandı qurılıs maydanshasına... Tábiyat qushaǵında, ottıń basında Doslıq sáwbetlerge hámme de ashıq, Biraq usı ullı isten ırasında Adamlar kete almas jırılıp qashıp. Sonlıqtan adamlar tábiyat ananıń Bulaǵına shóllep, saǵınsa shóbin, Qushırlana jutıp tawdıń samalın, Oqır ıntıǵısıp ırıńdı seniń. Jaqsılıq oyatıp qosıǵıńnıń kúshi, Juldızlar jılıslap túser biyikten. Tastan tasqa ırǵıp salqın suw ushın, Bulaqqa urlanıp keler kiyikler... Sonda quwanarsań shayırdıń sonsha Basqalar sezbegen lázzetin tatıp... Kel, dostım, taw Qusı oyanǵanınsha Bir sáwbet qurayıq ráhátke batıp!