Kól boyında

Qaytqan qusqa tolıp kók jiyek, Issı jaqqa ushar tırnalar. Mashinaǵa úylerin tiyep, Kól boyınan ketti sharwalar. Oshaq túter suw jaǵasında, Ketken onı iyesi taslap, Bul oshaqtıń aynalasında Shay ishkenmen talay jambaslap. Ǵarrı shopan úyin jıqtı da, Kabinaǵa otırdı endi. Qos burımın qoynına tıqtı da, Qızı juktiń ústine mindi. Júk ústinde iytin qushaqlap, Barar bizge shay quyǵan sol qız, Qız jurtında qalǵan oshaqka Qarap turman esirkep jalǵız. Kólde quslar bazarı tarqap, Issı jaqqa ushıp baradı. Jaslıq dáwran otawın jıynap, Bizdi taslap kóship baradı...