Izimbet

Balıqtan basqa kórmegen, Basqanı tamaq demegen, Palawdı urqip jemegen, Murdar nálet bále ekenseń, Úlken múlkin jeken tabaq, Qabaq salǵan sırlı tabaq, Salıp jegenin torta shabaq, Jarımaǵan neme ekenseń, Ashıwıma tiydiń meniń, Kóz kórgeni balıq seniń, Suwda ólip qalsa kónim, Ház etetuǵın bále ekensen. Molla oqır kitap-quran, Kewli xáste bolıp sáyran, Uslarǵanda qara tıran, Jan jolatpas neme ekenseń. Bir de duwa darımaǵan, Nalıs etpes sonda da oǵan, Ómirinshe jarımaǵan, Naq jetimek bále ekenseń, Ozińniń atıń Izimbet, Ákeńniń atı Pirimbet, Kisige etkizgen xızmet, Sen de sonday neme ekenseń. Ashlıq tegis barlıq elde, Qayta balıq bar bul jerde, Hámmemiz hám júrdik kólde, Parqın bilmes neme ekenseń. Ákenniń joldası Jusip, Bes balıqqa kewli ósip, Oldi aw salıp, suwǵa túsip, Sende sonday neme ekenseń, Adırayıp eki kózin, Ersili-qarsılı aytqan sózin, Sebep penen búgin biziń, Sóz qılatuǵın neme ekenseń, Azan menen minseń salǵa, Baqan, tayaw alıp qolǵa, Tuwesilmes uzaq jolǵa, Sapar eter neme ekenseń, Sebep bolıp barsaq qırǵa, Mingizedi jaydaq jorǵa, El qızıǵıp salmas qoyǵa, Jabayıday bále ekenseń, Adam edi quday qaqqan, Úy ishi birdeyin baqqan, Awızınan suwı aqqan, Ótewildey neme ekenseń, Qostamǵalı Xuw degendey, Bes mónke basın jegendey, Oybay qatın, suw degendey, Áwere bolǵan neme ekenseń. Qara pulın kisende joq, Kóziń kórip bilseń de joq, Aytqan nárse esińde joq, Quday atqan neme ekenseń, Bir tengege berip janın, Qunliqshiniń sorıp qapın, Jalmawızday burap sanın, Pıǵılın qashqan neme ekenseń. Qaranǵı tún boldı ma kesh, Aqıl bolsań sózimdi shesh, Haslım abız - atım Ótesh, Duwshar bolǵan neme ekenseń.