Maqsetim

Atam meni muǵállimge beripti, Tanıp kiyatirman barlıq háripti, Hújdanım aldıma tartip turıpti, Klastan-klasqa ótiw maqsetim. Onınshı klasti oqip pitkersem, Sabaǵımdı institutqa jetkersem, Imtixandı aǵla qilip ótkersem, «Bes» alıp bárh-bár oqıw maqsetim. Institut pitkergen soń diplomın alıp, Bilim saǵasına qarap jol salıp, Aspandı dáwirlep Tashkentke barıp, SAGU kursına kiriw maqsetim. Bergen bir keńesim barlıq ballarǵa, Bilim talap etken barlıq janlarǵa, Hár bala jetedi bul qıyallarǵa, Bul tiykarǵı ilim meniń maqsetim Bir qıyalım tinbay mektep qatnasam, Jaqsi oqip qalmay klass atlasam, Oylaǵan qıyaldıń bárin taqlasam, Degen qıyal meniń ullı maqsetim. Qıyalım bar, bilim qoymay oqısam, Oqıp kókiregime nıqlap toqısam, Ózimdi xalqıma bilimpaz qılsam, Ataqtı jáhánge jayıw maqsetim. Bir qıyalım oqıp men vrach bolsam Barlıq vrachlarǵa jáne bas bolsam, Xalıqtıń xizmetinde mudam taq tursam, Adamdı saw saqlaw meniń maqsetim. Bir qıyalım Watanımdı qorǵasam Suwıq xabar bolsa minut turmasam, Razvedchik bolıp aldın barlasam, Watan qorǵap, batır bolıw maqsetim. Bir qiyalim jáne injener bolsam, Orman, okean, tawdı-tastı qıdırsam, Altınǵa xalıq ǵaziynesin toltırsam, Gáwhar sham-shıraqtı tabıw maqsetim.