qosıq
Xosh bolıń, doslar
Jiyen Jıraw Amanlıq ulıQolımdaǵı qobızım,
Shalsam nama saladı,
Qayǵılı sesi shıqqanda,
Qol-ayaǵım taladı.
Kúnnen kúnge kewlimde,
Nege dártler toladı,
Kózimniń jası kól bolıp,
Etek-jeńim sel bolıp,
Ókpem awzıma tıǵadı,
Alqınaman halıqlap,
Sarı uwayım sarǵaytıp,
Jiliktiń mayın shaǵadı,
Men jılamay kim jılar,
Ata-ana sen, qaldıń,
Qurbı menen qurdasım,
Oynap ósken jasımnan,
Bawırman júrgen, joldasım,
Keynimde sen qaldıń,
Hadallap jıynaǵan mallarım,
Shımshırqaday ballarım,
Tarıqqanda hal bergen,
Ańlı sulıw quwlarım,
Oynap-ósken mákanım,
Búgingi kún sen qaldıń,
Jaylap ósken jerlerim,
Mańlaydan aqqan terlerim,
Biyorın jerde sen qaldıń,
Súyip alǵan qostarım,
Oynap ósken doslarım,
Qayǵıǵa tústi baslarım,
Keynimde qaldıńlar.
Qutı qashtı jerimnen,
Qaysı birin aytayın,
Kúyik bolıp bul qaldı,
Men jılayman qudayǵa,
Erte menen keshinde,
Quday maǵan bermeydi,
Bir nárseniń ózinde,
Men júrmen sońınan sarǵayıp,
Qayǵı qaynap ishimde,
Xosh bolıńlar, ósken jer,
Kettim kelmes jerlerge,
Ata jurtı Túrkstan,
Hesh kórmegen ellerge,
Xosh bolıń, aydın kóllerim,
Kettim basqa ellerge,
Quwraǵan quw jerlerge,
Xosh bolıń, qatar-qurdaslar,
Razı bolıń kórgenshe,
Endi qaytıp kelgenshe,
Men ketermen, ketermen,
Qayaqlarǵa jetermen,
Qaysı elge bararman,
Qayaqtan jay tabarman,
Ósken jerim sen qaldıń,
Bararıma jerim joq,
Qosılıp dáwran súrgenshe,
Kelermen be men qaytıp,
Kelmey ólip qalarman,
Xosh bolıń, doslar, xosh bolıń,
Men ólermen, ólermen,
Ólmesem qaytıp kelermen,
Xosh bolıń doslar, xosh bolıń,
Bul basıma tústi zulım,
Keler dep oylayman ólim,
Xosh bolıń doslar, xosh bolıń.
Kózime kórindi árman,
Bul basımnan ótti dáwran,
Xosh bolıń, doslar, xosh bolıń,
Keter boldım alısqa,
Tıǵılarman quwısqa,
Shıday almay baraman,
Artıq pitken tuwısqa,
Shıdamadı shırqırap,
Alqımınan buwısqa,
Bunnan ketsem, doslarım,
Kózim túspes tanısqa,
Ketpeyin dep oylap em,
Turar jerim bolmadı,
Aytqanımdı burınnan,
Heshbir zalım qılmadı,
Xosh bolıń, doslar, xosh bolıń,
Kórisermiz aqırı,
Ay jarılqap kún tuwsa,
Oǵan deyin ájelden,
Shıbın janlar saw bolsa,
Quwrap qalǵan shańǵıttan,
Aydınlı shalqar kól bolsa,
Munarlanǵan qızıl qum,
Qumlar túsip, sel bolsa,
Kóriskeymiz sol waqta,
Xosh bolıń, doslar, xosh bolıń.
Men ketermen, ketermen,
Qayaqlarǵa jetermen,
Qaysı elge bararman,
Qayaqtan jay tabarman,
Ósken jerim sen qaldıń,
Bararıma jerim joq,
Batarıma kólim joq,
Ketpeyin desem kúnim joq,
Shıǵararǵa únim joq,
Keynimde inim joq,
Qayǵırarlıq sińlim joq,
Artımda meniń ne qaldı?
Asqar biyik tawlarım,
Kólge salǵan awlarım,
Jánjel qılǵan dawlarım,
Kólden ushqan quwlarım,
Tasıp aqqan suwlarım,
Qurırma dep tamırı,
Dushpanǵa sepken uwlarım,
Qayǵıda júrip qarayıp,
Kóp oylaǵan oylarım,
Aq tayaq alıp qolıma,
Jasımnan baqqan qoylarım,
Qoylar baǵıp jasımnan,
Sharǵa bolǵan boylarım,
Kelispey heshbir talabım,
Qayǵıdan boldı toylarım,
Bul jerlerden ketken soń,
Qalay bolar hallarım,
Qanlar qashtı betimnen,
Kimler erer keynimnen,
Ómirim ótti qorlıqta,
Góne túspey iynimnen,
Jaslayımda jetim bop,
Ayrıldım aǵa-inimnen.