Sadıq Nurımbetov

Sadıq Nurımbetov — ataqlı xalıq shayırı. S.Nurımbetov 1900-jılı Kegeyli rayonınıń aymaǵında tuwılǵan. Onıń shayırshılıǵınıń qáliplesiwinde aǵası belgili shayır Sıdıq Toqpan ulınıń tásiri kushli bolǵan. Xalıq shayırı 1939-jılı Qaraqalpaqstannıń paytaxtı Tórtkulge shaqırtılıp ádebiyatımızǵa jaqınnan aralasıwǵa múmkinshilik tabadı, basqa da jazıwshı-shayırlar menen birge Moskva, Tashkent qalalarında bolalı. Shayırdıń qosıqları 20-jıllardan baslap-aq xalıq arasına tarqala baslaǵan. Sadıq shayırdıń «Biziń watan» (1940), «Jeńimpaz xalıq» (1942), «Batırlar alǵa» (1944), «Baxtıyar» (1950), «Tulkishek» (1956), «Farxad» (1958, 1978), «Jipekshi Jańıl» (1961), «Jańa zaman jırları» (1962), «Qanalaslar» (1968) degen toplamları basılıp shıqtı. Bunnan tısqarı shayır shıǵarmalarınıń eki tomlıǵı (1971,1972) járiyalandı. S.Nurımbetov «Qaraqalpaqstan xalıq shayırı» (1942), «Ózbekstan xalıq jırshısı» (1957) degen húrmetli ataqqa iye. Ol ordenler, medallar hám Ózbekstan, Qaraqalpaqstan Respublikası Jokarǵı Keńesinin húrmet jarlıqları menen sıylıqlandı. S.Nurımbetov 1939-jıldan Jazıwshılar awqamınıń aǵzası.