Ádenbay Tájimurtov

Ádenbay Tájimurtov — shayır, jazıwshı, folklorist alım. Á.Tájimurtov 1930-jılı 5-mayda Moynaqta Aq dárya awılında tuwılǵan 1946-jılı ol Xojelidegi peluchilisheni pitkerip, mektepte muǵallim, «Jas Leninshi» gazetasında bólim baslıǵı, rayonlıq gazetada redaktor bolıp isleydi, sońınan pedinstituttı tamamlap, radio esittiriw komitetinde, «Jetkinshek» gazetasında redaktor, Jazıwshılar awqamınıń baslıǵı, N.Dewqaraev atındaǵı Tariyx, til hám ádebiyat institutında ilimiy xızmetker, Qaraqalpaq mámleketlik pedinstitutında oqıtıwshı, Ózbekstan pedagogikalıq ilim izertlew institutınıń Qaraqalpaqstan filialında direktor lawazımlarında isledi. Á.Tájimurtov 1966-jılı «Qaraqalpaq xalıq qosıqları» degen temada kandidatlıq dissertaciyasın jaqladı. Onıń shıǵarmaları 50-jıllardın baslarında járiyalana basladı. Jazıwshınıń «Paraxatshılıq kepterleri» (1957), «Zarlıq hám Barlıq» (1967), «Hákke qayda» (1971), «Aydınlar» (1976), «Eń qadirli sózler» (1959), «Gúrrińler» (1960), «Sarkoplı batır» (1962), «Sheshiwshi káwli» (1968), «Maqset» (1974), «Sulıwxan» (1980) degen poeziyalıq hám prozalıq kitapları basılıp shıqtı. Folklorist alım «Qaraqalpaq xalıq qosıqları» (1965) degen kitap tayarlap oǵan kiris sóz jazdı, professor K.Maksetov penen birge studentler ushın «Qaraqalpaq folklorı» degen sabaqlıqtı jazıwǵa qatnastı (1979).