Babash Ismaylov

Babash Ismaylov — shayır, dilmash, sıńshı hám ádebiyat izertlewshisi. B.Ismaylov 1926-jılı 12-iyunda Ámiwdárya rayonında tuwılǵan, 1942-jılı orta mektepti pitkerip, mektepte muǵállim bolıp isleydi. 1948-jılı Qaraqalpaq mámleketlik pedagogikalıq institutın tamamlaydı hám usı instituta oqıtıwshı bolıp qaladı. 1951-53-jılları oblastlıq partiya komitetinde instruktor, «Jas Leninshi» gazetasında redaktor (1953-1956), Ózbekstan Respublikası Ekonomika hám mádeniyat kompleksli institutında ilimiy xızmetker boldı. 1958-1961-jılları «Qaraqalpaqstan» baspasında bas relaktor, Qaraqalpaqstan mámleketlik televidenie hám radio esittiriw komitetiniń baslıǵı (1961-1963), 1963 — jıldan ómiriniń aqırına shekem Oblastlıq partiya komitetinde ideologiya bóliminiń baslıǵı bolıp isledi. 1965-jılı «Kúnxojanıń omiri hám tvorchestvosı» degen temada kandidatlıq dissertaciyasın jaqladı. B.Ismaylovtıń «Jenis saatı» qosıǵı 1943-jılı «Qızıl Qaraqalpaqstan» gazetasında basıldı. Shayırdıń «Gúllen, Respublikam» (1954) «Geybirewdi ash buyirden» (1959), «Hárkimniń óz sıbaǵası» (1977), «Jıllar hám aylar» (1976), «Oqıwshılarǵa estelik» (1978). «Tańlamalı shıǵarmaları» basılǵan. Onıń 1972-jılı «Lirika hám satıra» degen toplamı rus tilinle jariyalandı. B.Ismaylov, A.T.Tvarlovskiy, R.Rulam, M.Lursınzada, K.Yashen, I.Yuzes, hámza Niyaziy, M.Rılskiy, E.Toqay, S.Oleynik hám taǵı basqa belgili jazıwshılardıń shıǵarmaların qaraqalpaq tiline awdarǵan. Ádebiyat izertlewshisi sıpatında B.Ismaylov «Kúnxojanıń omiri hám tvorchestvosı» (1961) degen monografiyasın bastırıp shıǵardı. Ol 8-10-klasslar ushın birinshilerden bolıp oqıw baǵdarlamasın dúzdi hám olarǵa arnap sabaqlıq jazdı, alımnıń tayarlawı menen Kúnxojanıń, Ájiniyazdıń toplamları basılıp shıqtı. B.Ismaylov Qaraqalpaqstan Respublikasına miyneti singen mádeniyat xızmetkeri (1968), Ózbekstan Respublikasına miyneti singen mádeniyat xızmetkeri (1969) xurmetli ataǵına iye edi, ol mámleketlik ordenler hám bir neshe martebe húrmet jarlıqları menen sıylıqlandı. Shayır «Jıllar hám aylar» degen kitabı ushın Qaraqalpaqstan Respublikası Berdaq atındaǵı memleketlik sıylıǵınıń laureatı (1976) boldı. Shayır hám alım, jámiyetlik isker Qaraqalpaqstan Respublikası Joqarǵı Keńesine bes ret deputat bolıp saylandı. Ol 1953-jılıdan Jazıwshılar awqamınıń aǵzası.