Dáwlen Aytmuratov

Dáwlen Aytmuratov — shayır, dramaturg hám alım. Dáwlen Aytmuratov 1933-jılı 3-mayda Qusqana tawınıń qubla tárepinde, Erkindárya aymaǵında tuwılǵan. 1962-jılı Moskvadaǵı A.M.Gorkiy atındaǵı ádebiyat institutın tamamlap, 1962-1973-jılları «Ámiudorya» jurnalınıń bólim baslıǵı bolıp isleydi, «Jetkinshek» gazetasında xızmet atqaradı. 1974-1976-jılları Alma-Atada «Qazaq film» kinostudiyasında, 1976-jıldan baslap N.Deukaraev atındarı Til hám ádebiyat institutında ilimiy xızmetker, aǵa ilimiy xızmetker lawazımlarında isleydi. Shayırdıń dáslepki qosıqları 1958-jıldan baslap jarıq kórdi. Onıń baspada «Qosıq hám tımsallar» (1960), «Aǵar dárya» (1965), «Tımsallar» (1975), «Men shınlıkqı súydim, olsız xesh nársede qadir yoq» (1990) degen toplamları hám «Yalǵanshınıń isi»‚ sońınan «Aqmaqlıq dunyasında» (1990) atlı komediyası járiyalandı hám «Pir qaqqan» komediyası teatr saxnasına qoyıldı. D.Aytmuratov tariyx, til bilimi tarawında 1986-jılı «Tyurkskie etnonimı» atlı kólemli izertlewin bastırıp shıǵardı. Ol E.Rotterdamskiy, T.Shevchenko, M.YU.Lermontov, S.A.Esenin, V.V.Mayakovskiy, A.Nawayı, Xafız, Sh.Rustaveli shıǵarmaların qaraqalpaq tiline awdardı. D.Aytmuratov «Qaraqalpaqstan Respublikasına miyneti singen medeniyat xızmetkeri» húrmetli ataǵına iye. D.Aytmuratov 1969-jıldan Jazıwshılar awqamınıń aǵzası.