Ótegen Ayjanov

Ótegen Ayjanov — jazıwshı. Ó.Ayjanovtıń dóretiwshiligi Moynaq, balıqshılarınıń turmısı menen tıǵız baylanıslı. Onın dóretpelerinde Aral balıqshılarınıń ómiri óziniń kórkem sáwleleniwin taptı. Ótegen Ayjanov 1925-jılı 25-yanvarda Moynaq rayonınıń 10-awıl keńesinde tuwılǵan. 1943-1944-jılları ekinshi jáhán urısına qatnastı, awır jaradar boldı, soń awılda muǵallim bolıp isledi. 1950-jılı Tashkenttegi yuridikalıq mektepti tamamlap, Qaraqalpaqstan Respublikası Ministrler Keńesinde xızmet atqaradı (1950-1952), socialık támiynat ministrliǵinde aǵa inspektor boldı (1952-1954). Ó.Ayjanovtıń «Tolkın» atlı birinshi gúrrińi 1950-jılı «Qızıl Qaraqalpaqstan» gazetasında daǵazalandı, birinshi toplamı «Balıqshı jigit» degen at penen 1955-jılı jarıqqa shıqtı. «Namıs» atlı povesti 1960-jılı basıldı. Onı kópshilikke tanıtqan «Aral qushaǵında» romanı (1958) boldı. Roman 1975-jılı ekinshi mártebe basıldı. Bul shıǵarma qaraqalpaq prozasınıń tariyxında belgili qubılıs boldı. Avtordın ózi qaytıs bolǵannan soń «Ustaz hám shákirt» (1969) degen povesti jarıqqa shıqtı. Ó.Ayjanov 1959-jıldan Jazıwshılar awqamınıń agzası.