Saǵıydulla Abbazov

Saǵıydulla Abbazov — balalar shayırı. S.Abbazov 1930-jılı 5-mayla Taxtakópir rayonında belgili xalıq shayırı A.Dabılovtıń shańaraǵında tuwılǵan. Ol 1947-jılı Tórtkuldegi awıl xojalık texnikumın pitkerip Qaraqalpaq mámleketlik pedinstitutının qaraqalpaq tili hám ádebiyatı bólimine oqıwǵa kiredi hám onı 1952-jılı tamamlaydı. S.Abbazov 1952-1957-jılları «Jas Leninshi» gazetasında kórkem ádebiyat bolimin basqaradı. Sońınan (1958-1964) «Jetkinshek» gazetasınıń juwaplı xatkeri, (1964-66) Tashkenttegi joqarı partiya mektebinde oqıydı, 1966-1976-jılları «Qaraqalpaqstan» baspasında kórkem ádebiyat boliminiń baslıǵı, bas redaktor (1966-1976) lawazımlarında isledi. 1976-1985- jılları Qaraqalpaqstan televileniesi hám radio esittiriu Komitetinde aǵa redaktor, bas redaktor, Komitet baslıǵınıń orınbasarı, 1985-jıldan ómiriniń aqırına shekem «Qaraqalpaqstan» baspasının bas redaktorı boldı. S.Abbazovtıń dáslepki shıǵarmaları 50-jıllarlan baslap baspa sózde kórindi. Ol balalar hám jas óspirimler ushın kóp ǵana shıǵarmalar dóretti. Onıń «Sırlı albom» (1962), «Meniń inim» (1964), «Kel, báhárim!» (1967), «Quslar qaytıp keledi eken» (1968), «Mektepte de, úyde de» (1977), «Mektepte bayram» (1987) sıyaqlı toplamları hám tańlamalı shıǵarmalarınan ibarat bir tomlıǵı jarıq kórdi. S.Abbazov K.Chukovskiy, S.Mixalkov, A.Barto, K.Muhámmadiy, G.Georgievtin bir qatar shıǵarmaların qaraqalpaq tiline awdardı. Shayırdıń «Timurovcı Arala» (1976) degen kitabı rus tilinde de basılıp shıqtı. Onıń bir qatar shıǵarmaları basqa tillergede awdarılǵan, namaǵa túsirilgen qosıqlarıda bar. S.Abbazov 1982-jıldan Jazıwshılar awqamınıń aǵzası.