Tájetdin Seytjanov

Tajetdin Seytjanov — shayır hám dramaturg. T.Seytjanov 1924-jılı 5-mayda Kegeyli rayonında tuwılǵan. 1942-jılı ekinshi jahan urısına atlanadı hám jaraqatlanıp 1945-jılı qaytadı. 1948-jılı Qaraqalpaq, Mámleketlik pedinstitutın tamamladı. Mektep direktorı, rayonlıq jaslar komitetiniń birinshi xatkeri lawazımında isledi. Ol 1952-54-jılları Tashkente partiya mektebinde oqıdı. Onı pitkerip kelgen son «Jas Leninshi» gazetasında, radiokomitette aǵa redaktor, Oblastlıq partiya komitetinde instruktor, «Ámiwdárya» jurnalınıń bólim baslıǵı, mámleketlik filarmoniyanıń direktorı, qalalıq mádeniyat boliminiń baslıǵı, «Sovet Qaraqalpaqstanı» gazetasında, mámleketlik televidenie hám radio esittiriw komitetinde baslıqtıń orınbasarı bolıp isledi. 1986-jıldan Jazıwshılar awqamında xızmet eti. T.Seytjanovtın dáslepki qosıqları 40-jıllardıń aqırlarında járiyalana basladı. Shayırdıń «Azamat jılı» (1955), «Ziyba» (1959), «Qanatlı jaslıq» (1960), «Ayna aldındaǵı sóz» (1965), «Báhár seni saǵındı» (1975), «Muxabbatnama» (1976), «Ómir filosofiyası» (1979), «Meniń arifmetikam» (1983), «Tasqın» (1990) sıyaklı poeziyalıq toplamları basıldı. Dramaturgiya tarawında T.Seytjanovtıń «Qırlı soqpaqlar» (1958), «Tınımsız tolqınlar» (1964), «Kuygelek kózli yar» (1959), «Jalın» (1969), «Abu Rayxan Beruniy» (1973) pyesaları saxnalastırıldı. Ol Nekrasovtıń «Rusta kim jaqsı turadı?», «Rus xayalları» poemaların hám Shevchenko, Nazım Xikmet, Rasul Ramzatov shıgarmaların qaraqalpaq tiline awdarǵan. Onıń rus hám ózbek tillerinde toplamları basılǵan. T.Seytjanov «Qaraqalpaqstan xalıq shayırı» (1974), «Qaraqalpaqstan Respublikasına miyneti singen mádeniyat xızmetkeri» (1969). Ol «Dank» ordeni, medallar, Ózbekstan hám Qaraqalpaqstan Respublikası Jokarǵı Keńesiniń húrmet jarlıqları menen sıylıqlanǵan T.Seytjanov 1955-jıldan Jazıwshılar awqamınıń aǵzası.