Xojabek Seytov

Xojabek Seytov — shayır hám jazıwshı. X.Seytov 1917-jılı 25-avgustta Taxtakopir rayonınıń Qarabuǵa awılında tuwılǵan. Ol dáslep baslaǵısh mektepte muǵallim, sońınan Tórtkulde muǵallimler institutın pitkerip, oqıw bóliminiń baslıǵı, Oblastlıq partiya komitetiniń instruktorı, radio komitettiniń baslıǵı boldı. Qaraqalpaq mámleketlik pedagikalıq institutın pitkerip Jazıwshılar awqamınıń baslıǵı, «Sovet Qaraqalpaqstanı» gazetasınıń bolim baslıǵı wazıypasında, keyin ala dem alısqa shıqqanǵa shekem Jazıwshılar awqamında kórkem ádebiyattı násiyatlaw byurosınıń baslıǵı lawazımında isledi. Jazıwshı eki ret Xúrmet belgisi ordeni hám medallar, Ózbekstan hám Qaraqalpaqstan Respublikası Jokarǵı Keńesiniń Xurmet jarlıqları menen sıylıqlanǵan, «Ózbekstan Respublikasına miyneti singen mádeniyat xızmetkeri» (1972) hám «Qaraqalpaqstan xalıq jazıwshısı» (1991) degen xúrmetli ataqlarǵa iye. Shayırdıń «Alǵa jeńiske» (1944), «Baxıtlı ómir» (1944), Ómir tańı» (1950), «Gúllengen awıl» (1955), «Tolqınlar» (1956), «Ámiw qızı» (1966), «Qızketken» (1957), «Báhárde Ámiw boyında» (1966) degen poeziyalıq toplamları basılıp shıqtı. Onıń poeziyalıq dóretpeleriniń «Tańlamalı shıǵarmaları» (1977) járiyalandı. X.Seytovtıń ózbek, rus tillerinde bir neshe toplamları baspadan shıqtı. Jazıwshınıń proza tarawında «Agronom predsedateli» (1956), «Mashaqatlı baxıt» (1958), «Hawirli samal» (1973) povest hám romanları jariyalandı, bulardıń ayrımları ózbek, rus tiline awdarılǵan. X.Seytov Tvardovskiydiń «Vasiliy Terkin» poemasın (B.Qayıpnazarov penen birge) hám Mirtemirdiń «Qaraqalpaq dápteri» shıǵarmasın Qaraqalpaqshalaǵan X.Seytov 1943-jıldan Jazıwshılar awkamınıń aǵzası.